கனமழை காரணமாக இன்று (18.11.2024) பள்ளிகளுக்கு விடுமுறை அறிவிக்கப்பட்டுள்ள மாவட்டம்
வளிமண்டல கீழடுக்கு சுழற்சி காரணமாக, தமிழ்நாட்டில் பல்வேறு இடங்களில் மழை பொழிந்தது. குறிப்பாக டெல்டா மாவட்டங்களில் தொடர் மழை பெய்து வருகிறது. நாகை மாவட்டம் வேதாரண்யத்தில் அதிகபட்சமாக 17.5 சென்டி மீட்டரும், கோடியக்கரையில் 13.4 சென்டிமீட்டரும் மழை பதிவாகியுள்ளது.
திருவாரூர் மாவட்டம் முழுவதும் கனமழை பெய்த நிலையில், அதிகபட்சமாக, திருத்துறைப்பூண்டியில் 2 மணி நேரத்தில் 7 சென்டிமீட்டர் மழை பதிவானது.
தஞ்சை மாவட்டம் பட்டுக்கோட்டை சுற்றுவட்டாரப் பகுதிகளில் கனமழை வெளுத்து வாங்கியது. கன மழையால், பட்டுக்கோட்டை மணிகூண்டு, தலைமை தபால் நிலையம், பேருந்து நிலையம் உள்ளிட்ட இடங்களில் மழை நீர் தேங்கி குட்டை போல் காட்சியளித்தது. குடியிருப்பு பகுதிகளிலும் தண்ணீர் தேங்கியதால், பொதுமக்கள் இன்னலுக்கு ஆளாகினர். தஞ்சாவூர் மாவட்டத்தில் தொடர்ந்து கனமழை பெய்துவருகிறது.
இதையடுத்து, தஞ்சாவூர் மாவட்டத்தில் இன்று பள்ளிகளுக்கு மட்டும் விடுமுறை அறிவிக்கப்பட்டுள்ளது. மழை காரணமாக பள்ளிகளுக்கு மட்டும் விடுமுறை அறிவித்து ஆட்சியர் பிரியங்கா உத்தரவிட்டார். அதேநேரம், கல்லூரிகளுக்கு விடுமுறை அளிக்கப்படவில்லை.
அதேநேரம், சிவகங்கையிலும் மழை பெய்துவரும் நிலையில், மழை பெய்யும் பகுதிகளில் உள்ள பள்ளிகளுக்கு விடுமுறை விடுவது தொடர்பாக தலைமை ஆசிரியர் முடிவெடுக்கலாம் என்று அம்மாவட்ட ஆட்சியர் அறிவித்துள்ளார்.
No comments:
Post a Comment