முதுகு வலி மற்றும் இடுப்பு வலி நீங்க எளிய இயற்கை வைத்திய முறைகள்..!

 முதுகு வலி  மற்றும் இடுப்பு வலி நீங்க எளிய இயற்கை வைத்திய முறைகள்..!

முதுகு வலிக்கு மருந்து, சிகிச்சை பற்றி இங்கு பார்க்கலாம். கடுமையான தாக்குதல் வந்தால் முழுமையாக 3-4 நாட்களுக்குப் படுக்கையில் நேராக அசைவு இன்றி மல்லார்ந்த நிலையில் படுத்திருங்கள். இதுவே வலியைக் குறைக்கும்.

வெந்நீர் ஒத்தடம் கொடுங்கள்

உட்காரும்போது நேரான முதுகுப் பக்கம் உள்ள நாற்காலி, அதுவும் பாதியளவு மட்டுமே சாய்ந்து கொள்ளும் அமைப்புக் கொண்ட நாற்காலியே சிறந்தது. இடுப்பைவிட லேசாக உயர்ந்த நிலையில் உங்கள் முழங்கால் இருக்கும்படி பார்த்துக்கொள்ளுங்கள். தேவைப்பட்டால் காலுக்குச் சிறிய ஸ்டூல் ஒன்று வைத்துக் கொள்ளுங்கள். கால் மேல் கால் போடாதீர்கள். நாற்காலியில் சரிந்து உட்காராதீர்கள்.

உங்கள் வேலை ஒரே இடத்தில் வெகு நேரம் அமர்ந்து செய்ய வேண்டிய வகைப்பட்டது எனில், இடையிடையே எழுந்து நில்லுங்கள். அல்லது சிறிது தூரம் நடந்து செல்லுங்கள். தூங்கும்போதும், ஒரு பக்கமாகப் படுக்கும்போதும் முழங்கால்கள் நேர்கோணத்தில் அமையும்படி விழிப்பாகக் கவனித்துக் கொள்ளுங்கள்.

குப்புறப் படுக்கக் கூடாது

ஸ்பாஞ்ச், இலவம் பஞ்சு நிறைந்த மென்மையான மெத்தைகளைத் தவிர்த்து தேங்காய்நார் மெத்தைகளில் படுப்பது நல்லது. ஸ்பிரிங் இல்லாத தட்டையான மரக்கட்டில் போன்ற ஒன்றில் படுக்க முயலுங்கள்.

படுக்கையிலிருந்து திடுமென எழுந்திராமல், மெல்ல உருண்டு படுக்கையின் ஓரத்துக்கு வந்து கால்களைத் தரையில் ஊன்றி எழுந்து உட்காருங்கள். பொருள்களைத் தூக்கும்போதோ உயர்த்தி எடுக்கும்போதோ முழங்காலை வளையுங்கள். முதுகை அல்ல.

பயணத்துக்குச் சுலபம் என்று ஒரே சூட்கேஸில் பொருட்களை அடைக்காதீர்கள். இரண்டு சிறிய அல்லது மீடியம் சைஸ் சூட்கேஸில் கொண்டு செல்லுங்கள். இரண்டையும் இரு கரங்களால் தூக்கும்போது சம எடைப் பங்கீடு வரும். முதுகுத் தசைகளுக்கும் சம வேலை கிடைக்கும். கார் ஓட்டும்போது உங்கள் கீழ் முதுகு சாய்ந்துகொள்ள ஒரு குஷன் உபயோகியுங்கள். இடைவெளி விட்டு விட்டு காரை நிறுத்தி இறங்கி நின்று, பின்பு தொடருங்கள்.

உட்கார்ந்து வேலை செய்பவர்களுக்கு

நெடுநேரம் ஒரே இடத்தில் உட்கார்ந்து பணி செய்யும்போது முதுகெலும்பு அதிக அழுத்தத்துக்கு உள்ளாகிறது. இதனால் இடுப்பு வலி ஏற்படுகிறது. குறைந்தது ஒரு மணி நேரத்துக்கு ஒரு முறையாவது இருக்கையை விட்டு இரண்டு நிமிட நேரம் நின்று சிறிது தூரம் நடந்து பின்னர் வந்து அமருங்கள்.

கணினியின் முன்பு அமர்ந்து வேலை செய்யும் இளைய தலைமுறையின் முதுகுத் தண்டுவடம் பாதிக்கப்பட்டு, இடுப்பு வலியால் துடித்துப் போகின்றனர். காரணம் இடைவிடாமல் கணினி முன்பு உட்கார்ந்து கொண்டே இருப்பது தான்.

கணினி வைத்தி ருக்கும் மேசையை, வசதிக்கு ஏற்ப ஏற்றி இறக்கும் வகையில் அமைக்க வேண்டும். பணி முடிந்ததும் நாள்தோறும் தவறாமல் உடற்பயிற்சி மேற்கொள்ள வேண்டும். சரியான முறையில் நாற்காலியில் உட்கார்ந்து பணியாற்ற வேண்டும்.

இளம்பெண்களுக்கு இடுப்பு வலி நீங்க:

நீங்கள் ஹைஹீல்ஸ் அணியும் பழக்கமுள்ளவர் என்றால், அதன் மூலம்கூட உங்களுக்கு இடுப்பு வலி ஏற்பட வாய்ப்புள்ளது. அதிக உயரமுள்ள குதிகால் உடைய செருப்புகளை அணிவதைத் தவிர்க்க வேண்டும்.

கை வைத்தியம்:

தேநீர்: தேவையான பொருள்கள்: மிளகு, கிராம்பு, சுக்கு.

முதுகு வலி அதிகமாக இருப்பவர்கள் 5 மிளகு, 5 கிராம்பு, 1 கிராம் சுக்கு சேர்த்து நீர் விட்டுத் தேநீர் செய்து தினமும் 2 வேளை குடித்து வந்தால் முதுகு வலி குறையும்.

எண்ணெய்: தேவையான பொருள்கள்: வெற்றிலை, தேங்காய் எண்ணெய்.

செய்முறை:

 வெற்றிலைகளை எடுத்துச் சாறு பிழிந்து தேங்காய் எண்ணெயில் கலந்து வலி இருக்கும் இடத்தில் தடவி வந்தால் இடுப்பு வலி, முதுகு வலி குறையும். வாதநாராயணன் இலையை விளக்கெண்ணெயில் வதக்கி ஒத்தடம் கொடுத்து வரலாம். வாதநாராயணன் இலை இடுப்பு வலியைக் குணமாக்கும். கொள்ளு பல பிரச்சினைகளைத் தீர்க்கும் இயற்கை உணவுப் பொருள். கொள்ளு ரசம் வைத்துக் குடிக்கலாம்.