இடைநிலை ஆசிரியா்கள் போராட்டம்:SSTA பொதுச்செயலாளர் வெளியிட்டுள்ள அறிக்கை

 இடைநிலை ஆசிரியா்கள் போராட்டம்:SSTA பொதுச்செயலாளர் வெளியிட்டுள்ள அறிக்கை

‘சம வேலைக்கு சம ஊதியம்’ என்ற கோரிக்கையை வலியுறுத்தி இடைநிலை பதிவு மூப்பு ஆசிரியா்கள் இயக்கத்தின் (எஸ்எஸ்டிஏ) சாா்பில் சென்னையில் திங்கள்கிழமை நடத்தத் திட்டமிருந்த முற்றுகை போராட்டம் பிப்.19-ஆம் தேதிக்கு ஒத்திவைக்கப்பட்டுள்ளது.

இது குறித்து அந்த இயக்கத்தின் பொதுச் செயலாளா் ஜே.ராபா்ட் சனிக்கிழமை வெளியிட்டுள்ள அறிக்கை:

2009-ஆம் ஆண்டுக்குப் பின்னா் நியமிக்கப்பட்ட இடைநிலை ஆசிரியா்களுக்கு ‘சம வேலைக்கு சம ஊதியம்’ திமுக ஆட்சிக்கு வந்ததும் வழங்கப்படும் என அந்தக் கட்சி தோ்தல் வாக்குறுதி அளித்திருந்தது. இதை வலியுறுத்தி எஸ்எஸ்டிஏ சாா்பில் கடந்த செப்டம்பா் மாதம் சென்னை நுங்கம்பாக்கம் பேராசிரியா் அன்பழகன் கல்வி வளாகத்தில் (டிபிஐ) தொடா் உண்ணாவிரத போராட்டம் நடைபெற்றது.

இதைத் தொடா்ந்து, ஏற்கெனவே அமைக்கப்பட்ட குழுவின் அறிக்கை 3 மாதங்களுக்குள் முதல்வரிடம் ஒப்படைக்கப்படும் என பள்ளிக் கல்வித் துறை அமைச்சா் அன்பில் மகேஸ் பொய்யமொழி தெரிவித்திருந்தாா். ஆனால், தற்போது 4 மாதங்கள் ஆகியும் எந்த நடவடிக்கையும் இல்லை; மேலும் அரசு சாா்பில் இதற்கான குழு அமைத்து ஓா் ஆண்டாகியும் கோரிக்கையை நிறைவேற்றுவதில் எந்தவித முன்னேற்றமும் இருப்பதாக தெரியவில்லை.

எனவே, ‘சம வேலைக்கு சம ஊதியம்’ கோரிக்கையை நிறைவேற்ற வலியுறுத்தி பிப்.12 முதல் பேராசிரியா் அன்பழகன் கல்வி வளாகத்தில் எங்களது இயக்கத்தின் சாா்பாக தொடா் முற்றுகை போராட்டம் நடைபெறும் என அறிவிக்கப்பட்டிருந்தது. தற்போது நிா்வாக காரணங்களால் போராட்டம் பிப்.19-ஆம் தேதிக்கு மாற்றப்பட்டுள்ளது என அதில் தெரிவிக்கப்பட்டுள்ளது.